高手集合

#留學生手記:香港和日本的大學堂,如此大不同!

老實說,係香港讀大學,課堂內外都少不免有種頹風。可能大部分人考DSE已經榨盡畢生精力,上到大學自然想讀得輕鬆啲。結果係大部分人從來唔會睇readings,唔會有學術討論,只求低空飛過,唔係Third Hon Grad就ok。所以係決定去外國留學時,都有幻想過係充滿學術氣氛嘅班房,莘莘學子爭相討論美中關稅如何帶來國際動盪,夜晚翻宿舍之前同roommate去圖書館睇埋第二日嘅readings等等。

 

呢種幻想係某啲國家應該係會發生的,但原來唔係日本。

 

究竟係香港讀大學同日本讀大學有幾唔同呢?以下幾點比個大概印象大家:

 
1. 時間表

香港嘅大學同大部分外國大學一樣,時間表係學生自己揀科自己安排。某啲堂係3個credits,就每堂上三個鐘,或者除開一個禮拜上兩堂每堂上個半鐘。係日本,雖然學生都係自己揀科,但每一堂個時間係固定。例如第一節課係9點到10點半,第二節係10點40分到12點10分咁。一夠鐘,全間U一齊transit,幾大陣象。

 

(圖:關西大學時間表)

既然每堂時間係固定,換言之lunch time同break都係固定。所以一到lunch time會好似以前工廠放飯咁,大家一齊衝去飯堂霸位。係香港,如果唔想係peak hour同人爭位,你大可以reg做2點落堂,之後3點先上堂,自制理想lunch hour,但係呢到係冇嘅。

然後其中一樣會令香港學生感到”Back to 17”嘅係,由於時間表係固定,日本大學係會打鐘的。仲要係大部分香港中學「凍~冬~東~洞,洞~東~冬~凍」個種聲。青春,真可愛青春。

 
2. 上堂形式

係香港,好大部分堂比起外國都係不太互動,多數都係睇Powerpoint,然後答下問題,寫下notes。好少會真係以討論為主帶動成堂。原來係日本,呢種教學方法仲可以更extreme。日本人教授基本上100%都係用「講義式」,即係派notes比你,然後佢逐隻字講。基本上佢唔會問你問題,日本學生有問題都好少直接舉手問,而係自己落堂問或者甚至唔問。

而且,日本大學好少有機會用lecture hall,多數係用前後都有門個種日式班房。一班少至10人多至80人,都係用班房上堂。加埋上面講日本教授點教書,其實令我諗返起中學去X理、現X補習,三間玻璃房一齊上堂個段又愛又恨嘅時光。


(圖:日本大學常用教室)


不過,大學生活又唔係淨係得上堂一部分。所謂大學五件事(上堂、住Hall、拍拖、打工、上莊)亦都唔能夠完完全全代表每個人嘅大學生活。既然去得留學,就每個方面都儘量體驗多啲啦。

例如我而加除左返學,每個禮拜都會去幼稚園教英文,發現日本兒童教育真係好值得學習。日本幼稚園唔似香港咁,教曬A-Z、成數表、成語動畫廊等等等等,但就有辦法令我覺得每個小朋友天真得黎好獨立好成熟。如果大家有興趣,下次就同大家講下日本小朋友究竟係幼稚園係學啲咩。

 

 

~~~~~~~~~~~~

 附上關西大學tour嘅vlog一集。想知道多啲課堂外嘅日本大學生活可以click下面望望: 

 

~~~~~~~~~~~~~~~~~~~~~~~~~~~~~~~~~~~

 

健吾按:其實,去到日本既大學都係去starbucks……

呀~~~~去找一些好玩的cafe回來嘛。還是這家是打巴好多靚仔靚女?

 

 

 

 

🌸🌸【今日精選推介 (最新)】🌸🌸
酒店優惠:
(1) Hotels.com 91折優惠 (推廣碼: CHAN18SEA) 優惠日期: 8月1日 至 8月31日 ➡  https://bit.ly/2vbFnap