深度文化談

日本教育對資訊科技的抗拒

日本被譽為科技大國,點都估唔到喺呢個科技大國,有2字頭嘅大學生連Microsoft Word file點save都唔識。

 

3年前啱啱入大學嗰陣有一堂係教Microsoft Office,學Word、Excel、PowerPoint。學唔緊要,一定有人耐唔用唔記得點用。點知上堂開電腦,隔嚟日本人同學連Word喺邊都唔知,超龜速一陽指打字做完個task,都唔識save。呢個同學仍然有一齊上堂做project,寫五、六百字嘅文,佢寧願用手寫,寫完龜速打返落Word。我5分鐘打完嘅嘢,佢可能要用半個鐘。今日又見佢好辛苦咁打,索性幫佢打埋。

 

而家2字頭嘅香港人,就算細個住公屋比較窮,由小學開始屋企點都有部desktop俾你玩LF2。你未必好熟電腦,但透過打機上咸網等等,你點都識得少少。就算你真係冇電腦,學校每個禮拜有電腦堂,小學3年班就教你上網打字,點會到大學連Word file點save都唔知。

 

不過喺日本,家長同學校對電腦科技好似普遍存懷疑態度。同學同我講學校基本上冇乜教電腦。另外,筆者Google一吓,根據2013年政府調查,日本10~19歲擁有手機、平板電腦、手提電腦等科技產品嘅比例,喺7個先進國家入面,除咗手提遊戲機排第一之外,全部包尾。而桌上型電腦的擁有比率更只有18.5%,比排尾二44%嘅法國仲要低兩成半。

▲最頂資訊科技產品左至右:手提電話•智能手機、平板電腦、手提電腦、桌上電腦、手提遊戲機

▲最左7個國家上至下:日本、韓國、美國、英國、德國、法國、瑞典

 

小朋友成長確實唔可以只對住個螢幕,但係喺現今社會,唔俾機會佢哋接觸科技又係唔係好事?嚟緊2020年日本小學開始會教programming,希望10年後唔會再有大學生唔識打字save Word file啦!

🌸🌸【今日精選推介 (最新)】🌸🌸

酒店優惠:

Hotels.com 91折優惠 (推廣碼: CHAN18SEA) 優惠日期: 8月1日 至 8月31日 ➡  https://bit.ly/2vbFnap 




作者
鰻魚重
留學生,生於香港,流浪東京。剛柔並重,心思細密。運動員身形,有八塊腹肌。