日本人出名愛乾淨。東京街道整潔，唔會見倒垃圾。去球場睇完波，佢哋會義務執垃圾。不過，你有冇諗過做義工執緊垃圾嗰個日本阿叔，個人衞生未必係咁好？

日本男人個個返工著到身光頸靚，俾人好乾淨企理嘅感覺。不過你喺日本去廁所嗰陣留意吓，好多日本西裝友屙完尿都唔洗手。呢個習慣，我喺大學入邊未見過，似乎係出咗社會嘅人先會咁。我問過一個40歲阿叔點解咁多日本男人唔洗手，佢諗咗一諗，輕輕帶過「佢哋唔記得咗掛。」

另一個日本男人唔衛生嘅地方，係會周街屙尿。放工同同事飲完酒行唔倒直線嘅西裝友，一急起上嚟，行埋一二邊屙尿周不時會見倒。筆者見過最誇張嘅，係喺新宿站丸之內線人來人往嘅月台，一個中年醉酒佬將身體靠喺出口指示牌，向咗月台便利店屙尿。路人見倒，只會望一望，然後若無其事繼續行。可能你話醉咗唔出奇，但係清醒嘅一樣有。

『菊花與劍』話日本民族性矛盾，例給佢哋既愛創新但又守舊。呢種矛盾，由屙尿都體現得到。