深度文化談

被寵壞的日本客?!

外國遊客去日本shopping,除咗係因為日本包羅萬有嘅商品,某程度係因為想享受日式貼心服務。

 

日本嘅零售業從業員基本上個個面帶笑容,對客人恭敬有禮,服務貼心。相比起喺其他國家買嘢嗰陣有部分店員黑口黑面,服務求奇,喺日本買嘢俾錢都俾得開心啲。

 

不過,有冇諗過長期習慣呢種服務態度嘅日本人,會覺得係理所當然,甚至被縱壞?第者曾經喺一間超市做收銀,遇過一啲無理客人。

 

喺日本買價錢較貴嘅玻璃樽裝商品,例如1500yen左右嘅紅酒,俾錢嘅時候會用平時喺香港包住生果嘅膠網包住玻璃樽,防止撞爛。然後再放入兩個膠袋(筆者覺得一個同兩個膠袋其實冇分別)。

 

有一次,有個上年紀阿叔買三枝約200yen嘅玻璃樽裝橄欖油,總共600yen左右,折合港紙約40蚊。因為金額細,公司唔會笠膠網(聽講成本貴),所以收錢嗰陣筆者淨俾咗兩個膠袋佢。


然後阿叔就開始指住我鬧:「你有冇搞錯!究竟係咩service!點解唔俾膠網我!」

經理咁啱喺隔離,即刻走過嚟同個客道歉:「唔好意思,真係唔好意思。我幫你包好佢。」跟住我都跟住講咗句「唔好意思。」


包好之後,阿叔攞住袋包好嘅貨品走,但不忘回頭再指住我大聲鬧:「你做好啲你嘅service呀!」我望住阿叔,冇俾任何反應,而經理就再鞠躬道歉。之後,經理靠近我耳邊細聲話:「唔駛驚,你冇做錯。日本有好多呢啲麻煩客,唔駛理佢哋,打發佢哋走就好。」


其實想要多啲service,講咪得囉,駛唔駛指住人鬧。你好地地講,加多句「唔該」,點會拒絕你。你對人好,人對你好。對店員好聲好氣,店員都會好樂意客氣serve你嘅。

🌸🌸【與女友「潤滑」感情的好物推薦】🌸🌸
更多資訊