深度文化談

踩油門當刹車掣ー高齡者駕駛問題

5月15號『家、ついて行ってイイですか?』特備節目,去咗一個男人屋企訪問,男人嘅大女因為涉及高齡駕駛者嘅交通意外過身,再引起社會關注老人駕駛安全問題,半個月後嘅6月4號又有一宗老人家揸車撞人事件。

 

喺大阪此花區一個停車場,一個80歲老人揸車嗰時搞錯刹車掣同油門,加速撞向四母子,令佢哋頭同腰等地方受輕傷,要送醫院治療。雖然今次嘅事件冇死人,但係高齡者嘅駕駛問題好似越嚟越嚴重。

 

喺人口老化嚴重嘅日本,高齡者揸車撞死人嘅情況越嚟越嚴重。根據內閣府數據,由2006年(平成18年)到2016年(平成28年)涉及75歲以上高齡者嘅交通死亡事故佔全部交通死亡事故嘅比率由7.4%升到13.5%,升幅近一倍。

要解決呢個問題並唔簡單。政府提出一啲方法去防止情況惡化,例如鼓勵高齡者主動放棄車牌,並送搭的士優惠券佢哋。又例如用減稅嘅方法,鼓勵高齡駕駛者買附有自動刹車功能嘅車,減低意外發生。不過,呢啲優惠金額唔大,未必有效果。

 

最近我有朋友都差啲遇到高齡者嘅交通意外。喺笹塚拖住小朋友綠燈過馬路嗰陣,一個老人揸車差啲刹唔切掣撞向朋友。雖然最後冇事,朋友冇追究,但係老人家嘅交通意外問題,喺日本確實已經變成嚴重社會問題。

🌸🌸【今日精選推介 (最新)】🌸🌸

酒店優惠:

Hotels.com 91折優惠 (推廣碼: CHAN18SEA) 優惠日期: 8月1日 至 8月31日 ➡  https://bit.ly/2vbFnap 




作者
鰻魚重
留學生,生於香港,流浪東京。剛柔並重,心思細密。運動員身形,有八塊腹肌。