現代人喺大城市生活，人與人之間嘅距離好近，但同時亦好梳遠。「你唔搞我我唔搞你」，大家河水不犯井水咁喺擁擠嘅環境下生活。但係，你有壓力，我有壓力，一個唔覺意行路撞親人或者逼電車時嘅不禮貌行為，都可以引爆一場人嘅怨氣。

彈丸之地住七百萬人嘅香港固然如此，民風彬彬有禮嘅日本都時有發生。然而，對於街頭爭執，日本人同香港人嘅反應不盡相同。

音量大不同

喺香港街頭或地鐡，一個唔覺意嘈起上嚟，雙方大聲互相問候，句句到肉。十幾分鐘入面全程丹田運氣，力竭聲西咁發出獅吼功去攻擊對手。然而，日本人始終比較含蓄，就算鬧交都比較溫文以雅。日本電車車廂和街頭較安靜，日本人即使鬧交嘅時候同樣能夠擁入環境，好「安靜咁爭執」。

好似我咁，我就曾經試過同日本友人搭電車時，突然友人唔知點解極速走咗去隔離車廂，我百般不解上前追問，佢好冷靜咁答我話：「隣の人が喧嘩してる。（隔離嘅人鬧緊交。）」日本人嗌交嘅聲浪可以仲低過我地平時講嘢，細聲到你唔知佢哋鬧緊交。

嗌完交道歉？

嗌交嗰時，通常對方唔出手嘅話，敵不動我不動，就算緊張情緒升級想郁手，大家始終唔想咩先出手被人拉。

而到咗呢個位，兩地嗌交嘅發展就有所不同。喺香港，嗌交到咗臨界點大家意識到唔對路嗰陣，雖然大家仍然會持續互相大聲指罵，但開始拉開距離，慢慢降溫緊張局面，邊鬧邊散場。亦或者係，其中一個扮死，另一個嚇到措手不及，慢慢退後離開現場。而喺日本，我見嗌交嘅人唔知點解都可以好有禮貌，為咗唔搞大件事，就算打完交都可以發揮日本人忍讓嘅精神低聲道個歉，大事化小離開。筆者曾在東京電車上俾醉酒男人揮拳打爛眼鏡，糾纏一陣，立即有兩個和事佬勸交，捉住醉酒男。冷靜下來後，醉酒男主動躹躬道歉賠償。

旁觀者大不同

香港人鍾意食花生眾人皆知，有人嗌交當然好多花生友在旁觀摩拍片upload上網，甚至為當事人吶喊助威，旁觀者都係做花生友。

然而日本人沒有「花生友」這特徵，見倒鬧交嘅時候，好多人會好似上述友人「怕麻煩」急急腳離開，唔俾自己卷入事件。另外亦都有一種人如上述會充當和事佬嘅分隔衝突當事人，苦口婆心告誡暴力解決不了問題，叫佢哋冷靜。

上面講嘅只係透過我親身經歷和見聞得出嘅個人意見，絕無將所有人歸納做同一類嘅意圖，世界各地都有撩交嗌嘅怪人同勸交嘅好人。

至於下次係日本見到人嗌交點？睇你自己啦。不過我相信，呢個世界既人，大部份時間，都係食花生既。有幾多人真係會想自己無啦啦受傷，再同人講既時候一定會畀人笑「抵死」？