日本市容非常整潔，棟棟樓睇落新淨企理。可惜好睇唔代表好食，好多人租咗住落先發覺甩皮甩骨中晒伏。筆者喺到列舉幾個日本租屋常見問題，俾啲溫馨提示之後會嚟日本嘅朋友。

噪音

日本樓主要有3種：鋼筋混凝土造（RCコンクリート造）、鋼結構造（鉄骨造）同木造（木造）。

呢三種入面鋼筋混凝土嘅隔音最好，而另外兩種就好差。到底差到點呢？基本上你同隔離屋嘅距離只係得塊木板，想同鄰居講嘢，你對住道牆講佢就聽到，門都唔駛開。所以夜晚訓教聽到隔離屋翻雲覆雨一啲都唔出奇。

有人會貼隔音棉喺牆身，先不論效果唔係好得，就算你擋到隔離，都擋唔到樓上嘅腳步聲。

由於樓上地板都好薄，樓上嘅人每踏一步，你間屋都會微震，好唔舒服。

就算係鋼筋混凝土，都可能只有小部份結構係混凝土，大部份係木造，所以睇樓嗰陣要敲下道牆睇吓係空心定實心，以防萬一。

水管

日本嘅舊樓，好多因為日久失修同老化，水管都會有問題。筆者曾經住過一間屋，每當樓上一開水，間屋嘅牆就會發出超大嘅震動迴響，直頭好似隔離屋裝修用電鑽鑽牆一樣。

呢個問題，始終好難予防，只可以check自己屋嘅水管有冇異樣。若果真係中伏，唯有等業主或管理公司同你修理。不過，要佢哋修理唔係咁易…

管理公司

管理公司係我覺得最麻煩嘅問題。

喺日本租屋，間屋有問題唔係搵業主幫你整，而係搵管理公司。管理公司做嘢永遠慢三拍，拖得就拖，加上就算佢唔幫你整，你基本上冇佢扶。筆者間屋嘅引擎水管，足足用咗3個月，每日打俾管理公司一次轟炸，佢先肯請人幫我整好，真係踢極都唔會郁。

有錢嘅話住新屋當然情況好好多，但係普通人租舊樓嘅話，以上問題時有發生，嚟日本住嘅朋友記得留意吓，唔好俾日本樓個樣呃到呀。