日本節目介紹香港都會以獵奇心態講風水,好似前世未見過咁。到底風水對佢哋係咪真係咁陌生!?
筆者有個朋友喺原宿開髮型屋,生意不俗,最近仲喺竹下通開埋分店。早排去新店搵佢剪頭髮,我到嗰陣,人好多,佢叫我坐喺reception隔離嘅等候區坐一陣。等候區有一張大長方型玻璃檯,可以擺倒8張櫈,長嘅邊可以放3張,短邊可以放2張。不過,咁大張檯,佢淨係放咗3張櫈,長嘅兩邊各放1同2張。
等咗一陣佢行過嚟問我:「新鋪裝修係咪好靚呢!呢張檯係咪好靚呢!」
我:「幾靚呀,檯腳同櫈手把係木造好型呀。但係點解咁大張檯只放3張櫈嘅?放多幾張啦。」
佢:「唔得呀。櫈嘅數量定咗㗎。」
我:「點解嘅?」
佢:「風水嘢嚟㗎!我信風水㗎。」
嚟日本咁耐,筆者第一次聽人講信風水。但諗吓諗吓,好似係邊度都見過啲風水嘢。係ドン・キホーテ(又稱唐吉訶德或激安之殿堂)!喺旺區嘅幾間唐吉訶德,門口都會有個超大魚缸養熱帶魚。
筆者google一吓,真係有人查詢過點解要放缸魚喺度。唐吉訶德嘅回覆大概係話,為咗客人可以喺唐吉訶德度過歡樂時光,一直推行喺店鋪擺魚缸,俾客人唔去水族館都睇倒魚。
▲唐吉訶德嘅回覆
筆者點都諗唔明,要客人開心有好多方法,點解一定要放魚缸?可能只係巧合,但唔知點解筆者始終覺得係風水魚。
但點都好,似乎日本都有信風水嘅人。