日本煙民多,煙嘅種類都超多,要記晒全部嘅名好困難。所以便利店等賣煙嘅鋪頭會俾每隻煙一個號碼,方便客人同店員。畢竟唔係所有人都食煙,店員唔食未必知啲煙名。不過如果有人要你記晒,你會覺得點?
6月頭有人喺Twitter發文話自己去便利店買煙嗰陣講咗隻煙嘅名出嚟,但係店員唔識煙名聽唔明,搞好耐先買倒。佢嬲嬲地喺Twitter搞公投,想知大家覺得邊個啱邊個錯,一個答案係「記煙名啦!」,另一個係「講冧把啦!」最後,呢個人得到最多嘅反應係「係唔講冧把嘅樓主嘅錯。」跟住,件事傳咗出去引起好多人討論。
「講冧把啦」嘅人:
「講數字唔係簡單啲咩?」
「200幾種點記晒呀。客人講數字仲快啦」
「咁多種煙,唔食煙嘅人點知邊隻打邊隻呀」
「煙嘅種類又多,又成日變。仲有,除咗賣煙,又要收水電煤費,又要處理郵件,又要入貨,咁多嘢做,你試吓收時薪1000yen做吓吖!買幾百yen嘢以為自己皇帝」
跟住有人加入吐苦水,話有啲客比齋講煙名嘅人更離譜:
「聽倒啲人講煙名嘅簡稱真係好炆」
「你講『不嬲嗰隻』鬼知你講邊隻咩」
「雖然個客嚟過好多次,佢鬧我『你好記住我隻煙啦喎!』,真係好嬲」
「記煙名啦」嘅人:
「收得錢就同我記住啲煙名佢」
「你返得呢份工就記住啲名佢」
「補貨(煙)嗰陣記晒佢啦」
「新仔就算喇…但係名同簡稱應該要記住…」
亦有人講出點解要講名嘅理由:
「有啲年齡層嘅人睇唔清楚,應該要記住佢哋成日食嘅煙名」
「間間鋪啲號碼都唔同好難搵」
「便利店啲號碼真係好難睇,一係啲煙擺近啲,一係直接比客人自己攞」
個人覺得幾百隻煙真係好難記,應該食煙嘅人自己都記唔倒…搵數字都係阻你少少時間,又唔駛開post搞公投嘅。真係眼唔好睇唔倒嘅話,印一本煙名表出嚟俾客睇如何呢?