日本鐵路非常發達，亦因為咁經常爆出一啲例如搞笑站名、秘境車站等等嘅趣聞。今次講嘅係一個「謎之車站」。

6月2號有網民喺Twitter發文話，自己以前搭電車返學成日訓著教，有一次試過起身之後發覺俾人載咗去都市傳說裡面嘅「謎之車站」。

「可能你地唔知我講緊乜，但我想講一件好耐以前嘅事…

成日搭車返學訓著教嘅我有一次坐電車，訓醒以為自己坐過龍，嗱嗱臨彈起身望出窗睇吓自己喺咩站，見到站牌寫住一個『？』字樣…嗰刻我完全覺得自己迷失咗喺都市傳說入面虛構車站嘅平行時空…」

睇真啲張圖，原來嗰個唔係問號，係兩個一大一細，上下排列嘅字。呢個站名其實叫『津』，讀『つ』。上排大大隻嘅『つ』同下排豆豉咁細粒嘅『津』擺埋一齊，所以睇落好似個問號咁。

通常電車站牌字樣大細都係同津站調返轉，漢字大，假名細。真係唔知邊個特登調轉呢個站牌字樣大細，整個問號出嚟整蠱人咁抵死。