上次講左（呢度呀）香港人係日本係有市場，你想搵工的話基本上都可以搵到。但問題係點解要幫日本人打工呢？到底日本人打工有咩好處？
- 唔怕俾人炒
有d人可能已經知道，日本有法律保障員工唔會俾僱主炒。一旦簽左合約做「正社員」（正式員工，短期合約同派遣員工不包括在內），老闆唔可以「隨便」炒人。老闆唔可以因為員工表現差而炒人。除非員工犯左致命錯誤（真係令人死個種），侵犯其他人，或者通公司櫃，貪污等犯法行為，而僱主又提供到證據同理據，證明係員工直接引起先可以炒人。日本法律企係員工個邊，加上日本好少分清個人責任，現實上被日本公司炒的情況微乎其微。所以入左日本公司唔怕因做唔到成績而俾人炒，聽聽話話就唔會俾人炒。但要小心唔好做最底個班，如果唔係會俾日本人迫你自動辭職。
- 教育制度
除左start-up，普遍日本公司都有好完善的「研修」制度，期間由3個月到1年不等。例如，某日本著名銀行，freshmen入去的話，研修連OJT要3年時間！轉職入日本公司都要研修，但時間比較短。「研修」的好處係有人貼埋錢俾你學野。大家去東京旅行時經常坐的「山手線」公司的最初就係每日返去好似學生咁上堂，但每個月都有人工收！對於咩都唔識的畢業生黎講一個好好的上台階。（但學到的skill將來有冇用就要睇你揀咩工同公司）中途轉職都好，「研修」可以幫你適應公司文化。唔會一轉入去就開工要交成績咁大壓力。
- 「家」一樣的工作氣氛
日本人有意無意地覺得工作一個人係日常生活，社會生活的延長線。人際關係比成果更加重要。比係做出結果，發揮自己的能力同價值，日本人更著重「大家」作為一個團體去做一件事。比係個人做出成果，一班人互相幫助，齊心去做一件事更得日本人評價。日本人鐘意大家好「和諧」咁柴娃娃去做一份工作。個人能力唔高唔緊要，得到同事，上司，下屬的歡心的話，要升職加人工都唔難。所以日本人會成日放工去飲酒，又會攪好多活動去維持人際關係。當然鐘意同事social的人會好開心，但唔鐘意同同事行咁埋的人會好痛苦。揀日本公司都要好似揀男女朋友咁小心。入錯公司的話會有好大心理壓力！
一句講曬，如果你係成果個方面睇，日本人做野係好hea! 無錯，日本人係好認真，但認真在細節同process而唔係成果同效能。同西方公司係完全相反。日本人咁做相對黎講會做得長同安定，而且留得愈長，人工愈高！所以日本人做野係攤長做，多人做同一樣野同hea的！只要同同事social到的話其實係好做的。但日本人都做野都有好多煩野！下次再講！
